Budyšin (CS/SN). Tři a poł měsaca po wohenju w bywšim Budyskim hotelu „Husarenhof“, kotryž bě mysleny jako azylowy dom, je so medialna napjatosć zaso złahodniła. Tak je nětko načasu podawki předźěłać, měni Budyski měšćanski zwjazk CDU, kotryž je so předwčerawšim za stajnym blidom z temu „Přiklesk, wćipni abo tola ničo njebyło?“ rozestajał.

Druhdy móže jeničke słowo rozsudne być. W nowinskej zdźělence wuchadźeše Zhorjelska policajska direkcija z třoch 19- a 20lětnych Budyšanow, kotřiž běchu dźěło wobornikow masiwnje haćili. Někotři ze zdźěla wopitych wćipnych ludźi běchu woheń z wjeselom a negatiwnymi přispomnjenjemi komentowali. Štož je so po tym we wozjewjenjach nadregionalnych medijow wuwiwało,­ dźensa hišće we wušomaj wobydlerjow klinči. Tak bě rěč wo „he­wrjekacej a kleskacej cwólbje“, kotraž bě prawdźepodobnje nadróžnu bitwu z wobornikami a policiju wjedła.