Předsyda SPD Sigmar Gabriel něhdyše lěhwo Auschwitz wopytał
Waršawa (dpa/SN). Něšto dnjow do 25. róčnicy němsko-pólskeho zrěčenja wo dobrym susodstwje je předsyda SPD Sigmar Gabriel něhdyše němske zaničowanske lěhwo Auschwitz-Birkenau wopytał. Na swojej internetnej stronje němski wicekancler po tym pisaše: „Žana jězba do žaneje kónčiny swěta njeje we mni tajki začisć zawostajiła kaž moja prěnja jězba do wopomnišća něhdyšeho koncentraciskeho lěhwa Auschwitz.“ Do wopytowarskeje knihi wopomnišća wón zapisa, zo nima słowow za to, štož je tam widźał. Zdobom pak čerpa wón ze zetkanjow z ludźimi nowu nadźiju, zo čłowjestwo „hižo nihdy zaso njedopušći, štož je so tule stawało“.
Dnja 17. junija budźe tomu 25 lět, zo stej Němska a Pólska zrěčenje wo dobrym susodstwje podpisałoj. Tón dźeń chce sej zwjazkowy prezident Joachim Gauck do Waršawy dojěć. Runočasnje pojědźe durinski ministerski prezident Bodo Ramelow (Lěwica) do Auschwitza, zo by tam wěnc połožił.
