Drježdźany (dpa/K/SN). Sakska móže dźakowano dobrej konjunkturje telko pjenjez wudać kaž hišće nihdy. Dwójny budget 2017/2018 předwidźi dochody a wudawki we wysokosći 37,1 miliardy eurow. Kwota inwesticijow ma we woběmaj lětomaj 16 procentow wučinjeć.

Ćežišća w etaće budu dale kubłanje, wědomosć a nutřkowna wěstota. Nowe su wudawki za azyl a zintegrowanje ćěkancow. 2016 změje Sakska za to znajmjeńša 800 milionow eurow nałožić, wot Zwjazka dóstanje pak jeno 382 milionow eurow.

Naćisk knježerstwa wobsahuje tež srědki za přidatnje 1 000 nowych městnow pola policije jako wurunanje za donětka wottwarjene. Wjace personala dóstanje zdobom kultus. Z tym reaguje so na přiběrace ličby šulerjow. K tomu ma so přichodnje wjace wučerjow wukubłać.

Nic naposledk přidźěli so komunam telko pjenjez kaž hišće ženje. Za nje je cyłkownje 12,5 miliardow eurow předwidźanych a tak cyła třećina budgeta. K tomu móža hišće přińć srědki z inwesticiskeho programa „Mosty do přichoda“ – 800 milionow eurow hač do 2020.