Róčnicu masoweho morjenja we wuchodobosniskej Srebrenicy wopominali

Göttingen (SN/MkWj). Składnostnje 21. róčnicy masoweho morjenja wjace hač 8 000 bosniskich muži a hólcow we wuchodobosniskej Srebrenicy je sej Towaršnosć za wohrožene ludy (GfbV) wjace­ zasadźenja na dobro Bosniskeje-Hercegowiny žadała. „Wot wójny zničeny a narodnje dźěleny kraj dyrbjeli ručež móžno do Europskeje unije přiwzać“, pominaše sej prezident GfbV Tilman Zülch, čestny wobydler Sarajewa. „Je skandalo­zne, zo zapad Bosnisku tak mało podpěruje. Europske knježerstwa su ludomordarstwu na europskej zemi w lětach 1992 do 1995 přihladowali a serbiskich wójnskich złóstnikow na wšelake wašnje samo podpěrali. Bosniska bě najwjetši wopor rozpada Juhosłowjanskeje“, prezident GfbV w nowinskej zdźělence rozłoži.