Nowa debata po krawnym nadpadźe 17lětneho w regionalnym ćahu

Berlin/Budyšin (dpa/SN/MkWj). Po terorowym nadpadźe 17lětneho požadarja azyla w ćahu pola Würzburga hrozy w Němskej nowa debata wo ćěkancach. Bayerski nutřkowny minister Joachim Herrmann (CSU) je hladajo na krawny njeskutk žadanje bayerskeje CSU potwjerdźił, ličbu do Němskeje přichadźacych ćěkancow wobmjezować. Šef kanclerskeho zarjada Peter Altmaier (CDU) wšak nima strach atentatow ze stron požadarjow azyla za wjetši. „Hdyž jara wjele ćěkancow do Němskeje přichadźa, móžu sej wězo předstajić, zo je tón abo tamny tajkim ideologijam přichileny“, rjekny Altmaier wčera w telewiziji ZDF.