Šef statneje kenclije so w LND wo serbskich medijach wobhonił

Budyšin (SN/mb). Jednaćel Ludoweho nakładnistwa Domowina (LND), Syman Pětr Cyž, witaše dźensa dopołdnja šefa sakskeje statneje kenclije Olivera Schenka (CDU), do domu LND. Schenk je zdobom krajny minister za naležnosće Zwjazka a Europy a za medije. W srjedźišću wopyta běše situacija serbskich medijow. Přewodźał je Schenka serbski zapósłanc z Budyšina w sakskim krajnym sejmje a předsyda parlamentariskeje přirady Załožby za serbski lud, Marko Šiman (CDU), kiž je termin organizował. Tež předsyda Domowiny Dawid Statnik, direktor załožby Jan Budar, předsyda załožboweje rady Marko Kowar, a Bogna Korjeńkowa, nawodnica Budyskeho studija MDR a zamołwita za hornjoserbski rozhłós, su přichwatali. Jako dalši zastupjer LND je so na rozmołwje wotrjadnik nakładnistwa za nowiny a časopisaj (Serbske Nowiny, Nowy Casnik, Rozhlad), Marcel Brauman, wobdźělił, šefredaktor našeho wječornika.