Drježdźany (BD/SN). Sakski Zwjazk Sahra Wagenknecht (BSW) ma za trěbne, zo so „kulturna a kubłanska awtonomija serbskeho ludu wot wysokeho stopjeńka samozamołwitosće a samopostajenja njese“. To wuchadźa ze zaměrow krajneho wólbneho programa, kotryž je sobotu stronski zjězd jednohłósnje schwalił.

Hladajo na wohrožowace połoženje serbšćiny podpěruje sakski Zwjazk – tak w koncepće za krajny sejm rěka – „serbsko-němsku zhromadnosć“ runje tak kaž „ciwilnotowaršnostny angažement Serbowkow a Serbow w jich towarstwach a zwjazkach“. Na spočatku serbskeho wotrězka w kapitlu 7 jewi so pozitiwne zwěsćenje k Serbam na zakładźe wuwića wot měrliweje rewolucije sem: „Demokratiske dźiwanje na zajimy ludoweje skupiny Serbow je w Swobodnym staće žiwa tradicija.“