Najebać přiměrjenje su renty wjelelětnych zawěsćenych na wuchodźe dale jasnje niše hač na zapadźe. Zwjazkarstwo Sahry Wagenknecht žada sej mjez druhim wobmjezowanje dawkow na rentu.
Berlin/Drježdźany (dpa/SN). Za šefowku BSW Sahru Wagenknecht su jenak wulke renty na wuchodźe a zapadźe hišće přewšo zdalene. „1 385 eurow renty w Sakskej po 40 lětach dźěła nima z wukonosprawnym systemom renty ničo činić. Zo rentnarjo w Sakskej přeco hišće 169 eurow mjenje pjenjez dóstawaja hač w zapadźe, pokazuje, zo smy wot jednoty renty daloko zdaleni“, rjekny wona powěsćerni dpa. Mnozy ludźo w Sakskej maja hišće jasnje mjenje w móšni.
„Zakonska renta lědma hišće žiwjenski standard zawěsća, ale woznamjenja za dźeń a wjace wobydlerjow socialny zestup w starobje. A potom přińdźe dawk na rentu hišće k tomu. Štóž změje rentu z mjenje hač 2 000 eurow měsačnje, toho měł fiskus na pokoj wostajić“, žada sej politikarka. Jeje zwjazkarstwo žada sej wyše renty po přikładźe Awstriskeje a wobmjezowanje dawka na rentu.
