Měto Nowak chce wustajeńcu wo politiskich stawiznach našeho ludu

Berlin (SN/mb). „Stawizny so njewospjetuja“, praji nawoda mjeńšinoweho sekretariata Měto Nowak. Najebać to móžeš z nich wuknyć, tohodla je wón njedawno składnostnje 30lětneho wobstaća Serbskeho muzeja w Choćebuzu namjetował, wosebitu wustajeńcu wo serbskich politiskich stawiznach wutworić. Tak zhoniš, zo su nacije Serbam najprjedy hołdowali, zo su Serbja jich wolili, a zo su nacije pozdźišo wšo serbske zakazali a samo planowali, serbski lud deportěrować. Porno ludźom ze spočatka 1930tych lět wěmy, kak móže tajka prawicarska towaršnosć wupadać: „Deportacije njewoblubowanych ludźi, primat jednotliwych rěčow a kulturow, diskriminowanje druhich, njedemokratiske předstawy hladajo na politiski system, wotstronjenje njewotwisnych medijow – to su wšo ideje, kotrež ludźo dale pěstuja.“