Wulki zajim ludźi za forum kandidatow w „serbskim“ wólbnym wokrjesu

Kamjenc (SN/mb). Najebać prózdniny a lěćo běše wulka žurla w „FlairHotel“ wosrjedź města wčera wječor derje pjelnjena. Wonka wabi hotel za zarjadowanja z Uwe Steimle, Frankom Schöbelom a Gregorom Gysijom, nutřka pak wojowaše šěsć kandidatow za direktny mandat we wólbnym wokrjesu 53/Budyšin 2 na lětušich wólbach krajneho sejma wo kedźbnosć připosłucharjow. W publikumje sćěhowaštaj Kathrin Michel (SPD), zapósłanča zwjazkoweho sejma, a Alojs Mikławšk, w tutym wólbnym wokrjesu wospjet direktny woleny zapósłanc CDU w krajnym sejmje, zajimawu diskusiju.