Budyšink (SN/bn). Přednoški a wopominanska nutrnosć tworjachu zazběh swjatočneho wotkrywanja pomnika za Hadama Bohuchwała Šěracha. Bronzowa busta na dwurěčnje popisanym postamenće su před cyrkwju w Budyšinku postajili, hdźež bě „nestor moderneho pčołarstwa, wusahowacy přirodowědnik, swěrny dušepastyr a serbski prócowar“ 25 lět skutkował. Günter Sodan, kiž bě pomnik składnostnje 300. narodninow Šěracha iniciěrował, dźakowaše so Šěrachowemu pčolacemu towarstwu, ewangelskej wosadźe a gmejnje Malešecy za wuhotowanje swjatka, Łuchowskej wuměłstwowej lijerni za zhotowjenje busty a Załožbje za serbski lud kaž tež priwatnikam za financowanje. Wosebje wuzběhny wón Edit Jurakowu, kotraž je „pozabyty žiwjenski skutk fararja a wědomostnika znowa w zjawnym wědomju zakótwiła“. Po słowach Malešanskeho wjesnjanosty Matthiasa Seidela (CDU) „njech pomnik tomu polěkuje, zo ludźo zasadnje tak spěšnje njezabudu, štó so za wjes a wobydlerjow zasadźuje“. Lawdator prof. dr.