Düsseldorf (dpa/SN). Hospodarstwo Němskeje lětsa njerozrosće. Tole je wuslědk konjunkturneje prognozy 2024 Hansa Böckleroweje załožby, kotruž su wčera wozjewili. Prognoza praji, zo nutřkokrajny brutto-produkt njepřiběra – ­fachowcy liča tuž z „rozrostom nule“. W tym zwisku swój dotalny posudk wo 0,1 procent zniža. Hospodarscy slědźerjo wopodstatnjeja lětušu stagnaciju mjez druhim ze zdźeržliwym naprašowanjom z wukraja a ze zlutniwosću stata nastupajo wudawki. Do toho běchu tež druhe hospodarske instituty „rozrost nule“ wuličili, mjez nimi Institut za makroekonomiju a konjunkturne slědźenje Hansa Böckleroweje załožby IMK. Tak konjunktura w tutym lěće njepřiběra, kónc lěta pak so hospodarske wuhlady trochu polěpša.

Klětu wočakuja fachowcy snadny rozmach. Institut liči 2025 z rozrostom hospodarstwa Němskeje wo 0,7 procentow. To zaleži mjez druhim na wysokich tarifowych wotzamknjenjach. Te wunjesu dźěławym lěpše dochody. Ludźo změja tuž zaso wjace pjenjez za wudawanje. Tež inflacija ludźi wjace tak njestarosći kaž hišće před něšto časom.