Wólbny bój wo serbsku radu w Braniborskej so zahajił
Choćebuz/Podstupim (SN/mb). „Waš kandidat za Serbsku radu 2024“ – wólbny bój je z wabjenjom w Nowym Casniku zahajeny. Z QR-codom na internetnu stronu Měta Nowaka došedši pak njewuhladaš jako prěnje wabjenje za sebje jako kandidata, ale za wólby: „Registrujće so jako wolerka a woler hač do 8.12.24 a wolće sobu.“ To je wažne, wšako „trjebamy wjele wolerjow“, kaž je Romy Ruffowa, zamołwita za serbske naležnosće we wokrjesu Sprjewja-Nysa, srjedu w serbskim radiju RBB zwurazniła. Wo pjeć městnow braniborskeje serbskeje rady so dotal sydom abo wosom ludźi prócuje, štož je wjac hač 2019, hdyž běše šěsć kandidatow. To je nam regionalna rěčnica Domowiny Heike Apeltowa po njedawnym zetkanju Domowiny ze serbskimi zamołwitymi wokrjesow w Delnjej Łužicy a w Choćebuzu wobkrućiła.
