Peticija wokrjesej Budyšinej wjele ludźi přeswědča, nic pak AfD

Budyšin (SN/mb). „Štož je dobre, njech wostanje!“ Pod tutym hesłom podpisuje dale a wjac ludźi „peticiju wokrjesej Budyšinej“ ze zaměrom, zo so městno społnomócnjeneje za wukrajnikow znowa wutwori. Wčera wječor bě jich 14 715 podpismow. Wězo njebydli kóždy podpisar w Budyskim wokrjesu. Wšako je rozsud wokrjesneho sejmika, na namjet frakcije AfD tute městno šmórnyć, raznu reakciju po wšej Němskej zbudźił. To widźiš tež we wopodstatnjenjach za podpis na internetnej stronje peticije pod change.org: Něchtó chce „njeekstremistiske, demokratiske mocy w Budyšinje podpěrować“. Druhi je podpisał, dokelž „hewak fašisća wšo spotorhaja, štož smy w lětdźesatkach docpěli.“