Drježdźany (dpa/SN). Sakske hospodarstwo so po měnjenju industrijneje a wikowanskeje komory dale njewuwiwa. Komora złožuje so při tym na wuslědki aktualneho konjunkturneho naprašowanja, na kotrymž bě so w septembru 1 630 předewzaćow z něhdźe 87 200 přistajenymi wobdźěliło. Po tym je so wobchodniske połoženje dale trajaceho słabeho zajima a wysokich kóštow dla lědma změniło. Lětsa wočakuja samo snadnje woteběracy hospodarski wukon.
„Wobchodniske połoženje industrije je so porno lońšemu lětu hišće raz pohubjeńšiło. Kmanosć wubědźowanja ćerpi přiběracych kóštow energije a stajnje sylnišo bywaceje konkurency, wosebje z Chiny, dla“, w rozprawje rěka. Dobra połojca předewzaćow rěči wo woteběracych wobrotach. Tež mnóstwo nadawkow dale spaduje. Nutřkokrajne naprašowanje je mjeztym 72 procentam wšěch zawodow najwjetši riziko. Třećina naprašowanych zawodow liči z pohubjeńšenjom wobchodniskeho połoženja, komora zdźěla.
