Njezwučene knježerstwo za Saksku? Kliman: Napinace, ale hinak njeńdźe

Drježdźany (SN/mb). Jednarjo stron CDU, BSW a SPD su „koaliciji ćernjowki“ w Sakskej puć rubali. Dotal běše z wašnjom, knježace politiske zwjazki na zakładźe barby wobdźělenych stronow pomjenować po chorhoji kraja z tutymi barbami. To pak w tutym padźe njeńdźe. Tohodla ma ćernjowka njezwučenej koaliciji mjeno spožčić: Hdyž ćernjowka zrawi, bywa najprjedy čerwjena (SPD), potom płód woćěmni do směra lila (BSW), doniž cyle njesčorni (CDU). Někotři prominentni sakscy čłonojo CDU drje su tute wuwiće wotwobarać spytali z namołwu, zo ma dobyćer wólbow tež z AfD rěčeć (SN su rozprawjeli). W prawym křidle sakskeje CDU lubuja ideju, wutworić mjeńšinowe knježerstwo a docpěwać wjetšinu w konkretnych temach jónu hromadźe z prawym, jónu z lěwym spektrumom parlamenta. To pak je ministerski prezident Michael Kretschmer raznje wotpokazał.