CDU/SPD z koaliciskim zrěčenjom za Saksku serbske žadanja spjelnjatej

Drježdźany (SN/mb). Najwjetša opoziciska frakcija w Sakskim krajnym sejmje, zwjazk Sahry Wagenknecht BSW, kritizuje, zo je „w koaliciskim zrěčenju wjele róžojtych słowow, ale nažel ničo konkretneho“. Za kapitl „serbski lud“ tole njepřitrjechja. Smy hižo wčera wo někotrych jasnych wuprajenjach, kaž „Serbski forum wědy na Lawskim arealu natwarimy“, rozprawjeli. Direktora Załožby za serbski lud, Jana Budarja, pak runje tak wjeseli, zo chcetej CDU a SPD „z přirostom srědkow za digitalne wužiwanje, medije a wučbnicy ćežišćo zwoprawdźić.“ Tutu sadu namakaš w zwisku z jednanjemi wo nowym financnym zrěčenju Sakskeje, Braniborskeje a Zwjazka za załožbu na dobu 2026 do 2030.