Wólbna komisija 39 kandidaturow za klětuše wólby wobkrućiła

Njebjelčicy (SN/mb). Wólbna komisija Serbskeho sejma je na zjawnym posedźenju pod nawodom Siegfrieda Kühna a jeho naměstnicy Marlis Pjacec wčera w Njebjelčanskim domje sportowcow po pruwowanju kandidatury za 2. Serbski sejm wobkrućiła. Wšo dohromady kandiduje 39 ludźi, 19 za Hornju a 20 za Delnju Łužicu. Kóždemu dźělej Łužicy přisteji 12 mandatow, wolerjo maja potajkim dosć wuběra. Za wólby gremija, kotryž so jako „prěnje demokratisce legitimowane ludowe zastupnistwo Serbow“ rozumi, móža so zajimcy tež online pod www.serbski-sejm-2024.de hač do klětušeho 27. februara registrować. Wólbne listy maja hač do 6. měrca 2025 wólbnej komisiji předležeć.