Zastupjerjo serbskeje iniciatiwy za měr w Ukrainje su wolóženi, zo skónčnje wo tym jednaja, pokročowanju morjenja zadźěwać. Zdobom su w zwjazkowym sejmje wo iniciatiwje rěčeli.

Berlin/Budyšin (SN/mb). Zapósłanča Żaklin Nastić witaše njedawno zastupjerjow serbskeje iniciatiwy za měr w Ukrainje, Hajka Kozela a Cyrila Pjecha, samo kašubsce do rumnosće skupiny Zwjazka Sahry Wagenknecht – rozum a sprawnosć (BSW). Nastić, něhdyša krajna předsydka Lěwicy w Hamburgu, ma pólske, němske, kašubske a židowske korjenja. Wona dźěła za BSW mjez druhim w zakitowanskim wuběrku zwjazkoweho sejma.