Hnojowu hromadu pokradnyli su nje­znaći w Jugenheimje pola hessenskeho Mainza. Za to wotstronichu paduši njedaloko konjaceho dwora elektriski płót a jědźechu z traktorom na pastwu. Wottam su połdra kubikneho metra hnoja sobu wzali. W hromadźe běchu wosebite wački, kotrež chcychu pakostnicy jako humus dale předawać. Wěcnu škodu trochuje mějićel na sto eurow.

Nadpad hororowych klawnow z machetu w Mnichowje bě wumysleny. Přećiwo pozdatnemu woporej a toho kumpanej, kiž bě so jako swědk wudawał, policija nětko přepytuje. 20lětny bě so z machetu sam zranił, dokelž so z njej hrajkaše. Policiji pak napowěda, zo su jeho hororowi klawnojo nadpadnyli. Nětko čakatej na njeho wumysleneho nadpada dla jednanje a zličbowanka policije. Ta bě wěc wuslědźiła­, po tym zo bě so při přepytowanjach dalšich swědkow prašała.

Berlin (dpa/SN). Zwjazkowy wobchadny minister Alexander Dobrindt (CSU) je sej wěsty, zo so Němska z EU w prašenju móžneho zawjedźenja nadróžneho popłatka za wosobowe awta hišće tutón měsac dojedna. Napřećo medijam rěčeše Dobrindt wo „wuskich a dowěrliwych rozmołwach“ z prezidentom komisije EU Jeanom-Claudeom Junckerom. Brüssel bě dotalne němske plany popłatka wotpokazał, dokelž su na njedobro wukrajnych šoferow, štož by prawidła EU raniło.

Bomba wosom ludźi moriła

Istanbul (dpa/SN). Při bombowym nadpadźe w kurdiskej metropoli Diyarbakir na juhowuchodźe Turkowskeje je dźensa znajmjeńša wosom ludźi žiwjenje přisadźiło. Wjace hač sto wosobow so zrani. Prawdźepodobnje jedna so wo sebjemordarski atentat, kaž ministerski prezident Binali Yıldırım zdźěli. Bomba rozbuchny njedaloko hłowneho sydła prowincneje policije. Krótko do toho běchu policisća wodźacych zastupnikow kurdiskeje opoziciskeje strony HDP zajeli.

Wumjetowanja wotpokazał