Brüssel (dpa/K/SN). Po dny trajacej ćahańcy Ceta dla dyrbi nětko wšitko jara spěšnje hić. Hač do połnocy ma wšěch 28 čłonskich statow EU za zrěčenje wo swobodnym wikowanju z Kanadu trěbne wobzamknjenja schwalić. Potom móža nowy termin za podpisanje postajić, štož bě so poprawom wčera stać měło. K nowej pozitiwnej situaciji je dóšło, dokelž bě so belgiske knježerstwo z Waloniskej a dalšimi regionami w cyle poslednjej chwili na kompromisy dojednać móhło. Na wobmyslenja kritikarjow zrěčenja Ceta­ ma so z přidatnymi postajenjemi a garantijemi dźiwać.

Soči (dpa/K/SN). Dźiwajo na wójnu w Syriskej a Iraku pomina ruski prezident Wladimir Putin za Bliski wuchod Mar- shallowy plan. „Njesměrne zapusćenja cyłych krajin trjebaja dołhodobny a kompleksny program za znowanatwar“, rjekny wón na kongresu w Sočiju. „Jeli chceće, je to dźensniša forma Mar­shalloweho plana za wožiwjenje tohole wot wójnow a konfliktow rozdrěteho regiona“, Putin zwurazni. Po Druhej swětowej wójnje běchu USA znowanatwar w Europje wosebje spěchowali, k čemuž bě tehdyši wonkowny minister George Marshall nastork dał. 1953 spožčichu jemu za to Měrowe Nobelowe myto. Zo su tuchwilne měrowe prócowanja za Syrisku wjazli a wojowanja znowa wudyrili, za to winuje Putin w prěnim rjedźe USA.

Chětro drohu zražku je žonje w durinskim Meiningenje jeje lubosć ke kóčkam wunjesła. 59lětna bě z awtom zastała, dokelž bě na kromje dróhi kóčce wuhladała. Jako chcyše jej ze strašneho pasma wuhnać, jeje awto same po skłoninje dele­ jědźeše. Prawdźepodobnje njebě šoferka ručne spinadło přićahnyła. Wóz jědźeše 20 metrow po dróze, doniž do parkowaceho awta njeprasny. Wěcna škoda wučinja něhdźe 26 000 eurow. Nimo toho so žona tež hišće zrani, jako spyta awto sama zadźeržeć.

Na wšě 25 lět bjez jězbneje dowolnosće je muž z awtom w Šwabskej po puću był. Dokelž bě přespěšny, jeho policisća zadźeržachu. Při kontroli wšak so wukopa, zo scyła žanu jězbnu dowolnosć nima. Tón bě hižo před wjele lětami dwójce wotedać­ dyrbjał. Tak je mjeztym štwórć lětstotka bjez dowolnosće jězdźił.

Rom (dpa/K/SN). Po dwěmaj ćežkimaj zemjerženjomaj w srjedźnej Italskej wobsteji nadźija, zo stej sej wonej mjenje woporow žadałoj, hač bě wočakować było. „Dyrbjało-li so wobkrućić, zo najebać sylnosć­ tejule zemjerženjow njeje žanych mortwych ani ćežkozranjenych, by to hotowy dźiw był“, rjekny nutřkowny minister Angelino Alfano. Šef ciwilneho škita­ Fabrizio Curcio wšak praji, zo su w potrjechenych kónčinach tysacy ludźi wo swoje bydła přišli.

Stawkej so wobarać

Düsseldorf (dpa/SN). Lětanske přede­wzaće Eurowings chcyło so 24hodźinskemu stawkej swojich sobudźěłaćerjow juristisce wobarać. „Damy wot prawiznikow přepytować, štó je za stawk zamołwity. Nimo toho pruwujemy wotpowě- dne sudniske kročele“, zwurazni rěčnik Eurowings powěsćerni dpa. Po zdźělenju předewzaća dyrbjachu dźensa 393 z cyłkownje 551 lětow wotprajić.

Wuradźuja wo Aleppje