Berlin (dpa/SN). SPD žada sej wot CDU a CSU, swoje rozkory na kónctydźenskej klawsurje w Podstupimje rozrisać. „Za koaliciju by měr wulka pomoc była“, rjekny frakciski šef SPD Thomas Oppermann. Měsacy trajacy konflikt mjez kanclerku Angelu Merkel (CDU) a šefom CSU Horstom Seehoferom dźěło knježerstwa wobćežuje. Unija so dźensa a jutře schadźuje, zo by so na zhromadne zaměry přichodnych lět dojednała.

W Španiskej znowa wola

Madrid (SN). Po tym zo njejsu so strony w Španiskej w zašłych měsacach na móžnu koaliciju dojednali, su wobydlerjo kraja zajutřišim, njedźelu, namołwjeni znowa wolić. Fachowcy wšak wěšća po­dobny wuslědk kaž w decembrje 2015, z čimž móhło połoženje w kraju nje­změnjene wostać. Lěwicarskoalternatiwna strona PODEMOS drje dale postupuje, po aktualnych naprašowanjach pak leži hišće za konserwatiwnej ludowej stronu tuchwilu amtěrowaceho minis­terskeho prezidenta Mariana Rajoyja.

Njewjedra hroža

Na dnju europskeho referenduma je wčera w Rogeńskim parku chorhoj zjednoćeneho kralestwa Wulkeje Britaniskeje zmawowała, a to na třěše tamnišeho hrodu. Wosebity zajim za tajke podawki ma w Rogeńcu tradiciju. Do historiskeho wothłosowanja hižo běchu so mnozy w Němskej bydlacy Jendźelčenjo po cyłym kraju wo němske staćanstwo a tak wo wupisanje němskeho pasa prócowali. Foto: Michael Helbig

Berlin (dpa/K/SN). Njedźiwajcy kritiki škitarjow datow a opozicije je čorno-čerwjena wjetšina zwjazkoweho sejma dźensa nowy paket antiterorowych zakonjow schwaliła. Zwjazkowy zarjad za škit wustawy smě sej tak daty wo terora podhladnych z wažnymi wukrajnymi škitnymi instancami wuměnjeć. Z dodatnej změnu koalicija tež docpě, zo so daty wohroženych młodostnych hižo wot jich 14. žiwjenskeho lěta składuja a nic hakle wot šěsnateho. To tohodla, dokelž so po dopóznaćach wěstotnych mocow přiběrajcy hižo njepołnolětni radikalizuja. Dowěrnica Zwjazka za škit datow Andrea Voßhoff kitizuje, zo ma zakoń tójšto wustawoprawnych rizikow.

Frankfurt n. M./Viernheim (dpa/SN). Bjerjer zastajencow we Viernheimje je 19lětny Němc z Mannheima, bydlacy naposledk w Delnjej Sakskej. Tole zdźěli dźensa statne rěčnistwo w Darmstadće. Młody muž wohrožowaše wčera popoł­dnju w kinje štyrjoch přistajenych a 14 wopytowarjow, mjez kotrymiž běchu tež dźěći. Při sebi měješe trašawki a tohorunja atrapy granatow. Wótre brónje pak žane njeměješe. Motiw skućićela je dale njeznaty. Pokazki na teroristiski abo politiski pozadk policija tuchwilu žane nima. 19lětny bě wčera maskěrowany do kina přišoł a tam zastajencow brał. Přiwołana policija jeho pozdźišo zatřěli. Ze zastajencow so nichtó njezrani. Dalše informacije wo skućićelu njeje statne rěčnistwo dotal žane mjenowało.