Mjezy znjesliwosće docpěli
Zwjazkowe knježerstwo etat lěta 2025 předstajiło
Berlin (dpa/SN). Kak wobćežne jednanja wo etat 2025 woprawdźe běchu, je financny minister Christian Lindner hišće raz potwjerdźił: „Njejsmy so bojeli, tež mjezy móžneje znjesliwosće w knježerstwje docpěć“, rjekny předsyda FDP, jako wón wčera etat w Berlinje předstaji. Krótko do toho bě naćisk wudiskutowaneho etata prěni zadźěwk přewinył: Zwjazkowe knježerstwo bě jón schwaliło. Nětko móža jón zwjazkowemu sejmej dale posrědkować.
Wjace hač 480 miliardow eurow chce amplowe knježerstwo SPD, Zelenych a FDP klětu wudać, nimale třećinu z toho jako kredit. Někotre předewzaća su dale chětro njewěste, dokelž drje dyrbi je zwjazkowe wustawowe sudnistwo hakle pruwować. Doskónčnje drje schwala etat w zwjazkowym sejmje kónc nowembra.
Budget němskeho stata wopřija 480,6 miliardow eurow, wosom miliardow mjenje hač lětsa. Cyłkownje 78 miliardow eurow předwidźi financne ministerstwo za inwesticije, štož je rekord. Lindner zaplanuje klětu nowy kredit 43,8 miliardow eurow, znowa něšto mjenje hač lětsa.
ADAC: Puć do šule nazwučować
Drježdźany (dpa/SN). Sakska wotnožka awtomobiloweho kluba ADAC radźi staršim šulskich nowačkow, ze swojimi dźěćimi wěsty puć do šule wupytać a jón nazwučować. „Jenož přez trening a pod nawodom staršeju, kotrajž so samaj přikładnje zadźeržitaj, dźěći nawuknu, kak maja wěsće w nadróžnym wobchadźe po puću być“, ADAC zdźěla. Po puću měli staršej dźěći na móžne strachi skedźbnić, bjez toho, zo bychu nowačkow zatrašili. „Su-li dźěći hižo poměrnje wěste, móhli so přewodźace wosoby dale a bóle wróćo dźeržeć a w pozadku kontrolować. Runje w spočatnych dnjach dyrbja dźěći prěnich lětnikow tójšto zaćišćow předźěłać. Puć do šule je jenož jedyn z nich. Strach njezbožow je w tymle času we wokolinje zakładnych šulow wosebje wulki.
W Sakskej započina so nowe šulske lěto 5. awgusta. Za 40 500 holcow a hólcow zahaji so z tym nowy žiwjenski wotrězk. Po přepytowanju ADAC 2023 rozsudźa so ludźi w Sakskej přewažnje za najkrótši puć do šule, mjenujcy 57 procentow. Z wida fachowcow pak měła wěstota dźěći najwažniša być. 64 procentow nowačkow přińdźe pěši do šule.
To a tamne (18.07.24)
W traktorje nana sej wusnył je dwě lěće stary hólc w rudnohórskim Elterleinje a je tak wulku pytansku akciju policije a wohnjoweje wobory zbudźił. Samo staflu wuchowanskich psow su zasadźili. Hólc bě so po hrajkanju ze swójbu wčera wječor zminył. Dokelž njemóžachu jeho namakać, wołachu wo pomoc. Po dwěmaj hodźinomaj namakachu synka spicy w traktoru na ležownosći swójby, do kotrehož bě sej pjerach zalězł.
Alkoholowa jězba načolneho kandidata braniborskeje CDU Jana Redmanna z elektriskim rolerom je dale tema w medijach. Nowiny rozprawjeja, zo je policija 44lětneho politikarja zadźeržała, dokelž bě toho chabłaca jězba napadnyła. Redman twjerdźi, zo jednaše so wo rutinowu kontrolu bjez wosebiteje přičiny. Zastojnicy zwěsćichu 1,3 promile alkohola a sćazachu jězbnu dowolnosć.
„El Hotzo“ njehodźi so do RBB
Podstupim. Zjawnoprawniski sćelak Berlin-Braniborska (RBB) zakónči kooperaciju ze satirikarjom Sebastianom Hotzom („El Hotzo“), kiž dotal wusyłanje „Teoretisce cool“ młodźinskeho sćelaka „Fritz“ moderěrowaše a prjedy žorćiki za ZDF-zabawjerja Böhmermanna pisaše. Hotz wobžarowaše w syći X, zo njeje atentatnik Donalda Trumpa morił, wšako „je absolutnje fantastiske, hdyž fašisća wuměraja.“ RBB zdźěli, zo so tute „wuprajenja do hódnotow RBB njehodźa“.
Ukrainske jednotki cofaja
Cherson (dpa/SN). Ukrainske wojerske jednotki su po njeoficialnych informacijach zepěranišća na juhowuchodźe kraja pola Krynky w Chersonskej kónčinje a Urošanje njedaloko Donjecka ruskich nadběhow dla wopušćić dyrbjeli. Dale wojować njeby hladajo na wulke zničenja žadyn zmysł wjace měło, generalny stab ukrainskeho wójska zdźěla. Ruska je hižo před dlěšim časom ofensiwu w tutej kónčinje zahajiła a teritorij zdobyła.
Schröder Merkel wuzběhnył
DJV distancuje so wot AfD
Knježerstwo dale w słužbje
Paris (dpa/SN). Francoski prezident Emmanuel Macron je dotalne knježerstwo ministerskeho prezidenta Gabriela Attala prosył, dale w słužbje wostać, doniž njeje nowe knježerstwo pomjenowane. Tole je palast prezidenta po posedźenju kabineta zdźělił. Wšitke politiske strony su namołwjene, so wo zhromadne dźěło w zmysle ludźi prócować. Do toho bě Macron wotstup Attala po wólbnej poražce knježerstwoweho lěhwa při wólbach parlamenta před tydźenjom akceptował.
Wólby bě zwjazk lěwicarjow dobył. Toho nawodźa pak su dospołnje zwadźeni.
Bidena dočasnje nominować?
Washington (dpa/SN). Wosrjedź debaty wo starobje a strowoće prezidenta USA Joewa Bidena nawodnistwo demokratow na tym dźěła, 81lětneho hišće do planowaneho zjězda strony w awgusće na wirtuelnym puću za prezidentskeho kandidata wuzwolić. Zamołwići chcedźa po tutym puću zaručić, zo steji mjeno Bidena při wólbach w nowembru woprawdźe we wšitkich zwjazkowych statach na wólbnym lisćiku. Mjez demokratami w kongresu tute postupowanje kritizuja.
Biden steji tuchwilu swojej starobje a dwělow strowotneje kmanosće dla pod masiwnym ćišćom w rjadach swojeje demokratiskeje strony. Wjacori zapósłancy běchu jeho minjene tydźenje namołwjeli, bój wo zastojnstwo prezidenta skónčić a wotstupić. Druzy zwuraznjeja swoje starosće hladajo na šansy Bidena. Tón prezentuje so dotal bojowniski.
81lětny Biden bě předwólby pola demokratow bjez chutnych přećiwnikow dobył. Nětko dyrbja jeho hišće na wulkim zjězdźe strony srjedź awgusta w Chicagu oficialnje nominować.
Njewjedro festiwal skónčiło
Wichory a zliwki w Słowakskej škody zawostajili a sej wopory žadali
Trenčín (dpa/SN). Koncert pod hołym njebjom w słowakskim Trenčínje su minjeny pjatk dočasnje skónčić dyrbjeli, po tym zo bě njewjedro wšón areal zapusćiło a wjacorych wopytowarjow zraniło. Dokelž njemóžachu fachowcy w běhu 24 hodźin zwěsćić, hač je wěstota wopytowarjow hišće zaručena, su program přetorhnyli a ludźi domoj pósłali, tak medije rozprawjeja. Ludźo rozsud zarjadowarja chcyjo nochcyjo akceptowachu a festiwalne swjedźenišćo w běhu dnja wopušćichu.
Festiwal „Pohoda“ na terenje Trenčínskeho lětanišća běchu štwórtk zahajili. Po planje chcychu jón sobotu wječor z wulkim koncertom zakónčić. Zarjadowanje, na kotrymž mějachu wuměłcy kaž James Blake, skupinje Morcheeba, Black Pumas a słowakski spěwar Richard Müller wustupić, bě na 30 000 přihladowarjow wusměrjeny.
Pjatk wječor bě so při sylnym njewjedrje stan zwjezł. Po informacijach medijow běchu sej wjacore sta wopytowarjow do stana wućeknyli. Pomocnicy pytachu z psami a ćopłotnymi kamerami za ludźimi pod hoberskej stanowej planu.
Signale słabosće
Youtube kanal Compact wotpinył
Berlin (dpa/SN). Po zakazu časopisa Compact přez zwjazkowe nutřkowne ministerstwo je tež Youtube wotpowědne wobsahi na swojej widejowej platformje zawrěł. Dotal su dwaj kanalej wotpinyli, kotrež maja z magacinom Compact činić, internetne předewzaće z USA na naprašowanje powěsćernje dpa zdźěli. Štóž je wčera wječor na platformje za wobsahami w zwisku z Compact pytał, tón je zhonił, zo njeje kanal ze statysacami abonentami hižo wjace přistupny.
Zakaz běchu wčera rano wozjewili. Wot zwjazkoweho zarjada za wustawoškit jako prawicarsko-ekstremistiski zastopnjowany magacin Compact njesmě hižo dlěje wuchadźeć. Zwjazkowa nutřkowna ministerka Nancy Faeser (SPD) bě magacin zakazała. Bydlenja zamołwitych su přepytowali. Faeser magacinej wumjetuje, zo je „centralny rěčny organ prawicarskeje sceny“ a zo přećiwo Židam a migrantam šćuwa. Šefredaktor Compact Jürgen Elsässer rěčeše porno tomu wo dotal njesłyšanym zasahnjenju do nowinarskeje swobody a rjekny reporteram: „Štož dźensa w BRD mamy, je njedemokratiski režim, kaž bě to režim SED.“
