Kak jězdźenku financować?
Wobchadni ministrojo zwjazkowych krajow žadaja sej sobudźěło Zwjazka
Berlin (dpa/SN). Cyłoněmsku jězdźenku za 49 eurow klětu podróša. „Wobchadni ministrojo zwjazkowych krajow su sej přezjedni, zo płaćiznu jězdźenki w januarje 2025 zwyša“, rjekny wobchadny minister Sewjerorynsko-Westfalskeje Oliver Krischer (Zeleni), po wurjadnym posedźenju ze swojimi kolegami wčera wječor w Düsseldorfje. Što abonement za zjawny bliskowobchad potom płaći, njeje tuchwilu wotwidźomne. Aktualna płaćizna 49 eurow dlěje móžna njebudźe.
Na konferency wobchadnych ministrow w nazymje chcedźa konkretnišo wo tym rěčeć, „hdyž nam wšitke ličby, daty a fakty, wosebje pak politiske rozsudy zwjazkoweho knježerstwa“ předleža, Krischer rjekny. „Jako wobchadni ministrojo krajow smy na tym zajimowani, powabliwosć jězdźenki zachować. „Chcemy wšitko za to činić, zo je zwyšenje tak moderatne kaž móžno“, wón dale rozłoži.
Znowa zelenu swěcu?
Žadaja sej wyšu mzdu
To a tamne (09.07.24)
Pjaneho přewodźerja lětadła je policija na nižozemskim lětanišću Schiphol domoj pósłała. Při alkoholowej kontroli lětadłoweho personala rano w 7.50 hodź. měješe steward telko alkohola w kreji, zo njeby ani wjace z awtom jěć směł. Za lětadłowy personal płaći mjeza nul promile alkohola. Dźesać hodźin do wotlěta je alkohol kruće zakazany. Steward dyrbi tysac eurow pokuty płaćić.
Na wšěch 58 hot-dogow w dźesać mjeńšinach zjědł je Američan Patrick Bertoletti na tradicionalnym napřemojědźenju składnostnje dnja njewotwisnosće USA. Tysacy ludźi su kóždolětnemu spektakularnemu zarjadowanju w New Yorkskim měšćanskim dźělu Coney Island přihladowali. Dotalny dobyćer Joey Chestnut bě sponsoroweho konflikta dla wuzamknjeny. Pola žonow je faworitka Miki Sudo ze 51 hot-dogami nowy rekord nastajiła.
BSW a CDU hromadźe dźěłać?
Erfurt/Drježdźany (dpa/SN). BSW-šefina Sahra Wagenknecht sej hladajo na wólby w Sakskej a Durinskej kooperaciju žada. W Swobodnym staće je pokazkow, zo je CDU zwólniła z BSW hromadźe dźěłać, zdźěli Wagenknecht w interviewje z redakciskej towaršnosću z Berlina. „Předewšěm dźe wo wobsahowe wěcy“, wona zwurazni a skedźbni na nowy započatk w zwisku z kubłanskej politiku, na mjenje běrokratije a wjace wěstoty w zjawnosći. We woprašowanjach docpěje BSW w Sakskej třeće městno.
Orban wopyta Chinu
Peking (dpa/SN). Ministerski prezident Madźarskeje Viktor Orban wopyta njewočakowano Chinu. Wo tym rozprawjachu dźensa chinske statne medije. Wón zetka so ze šefom stata Xijom Jinpingom. Předewšěm dźe wo wójnu w Ukrainje. Po słowach Orbana ma China „klučowu móc“, kiž móhła wuměnjenje za měr w kraju być. Hakle minjeny pjatk bě Orban w Moskwje, hdźež zetka ruskeho prezidenta Wladimira Putina.
Wojacy zhromadnje zwučuja
W Parisu dóńdźe wčera po wozjewjenju wuslědkow wólbow parlamenta ...
Jednota rentow hišće přewšo zdalena
Najebać přiměrjenje su renty wjelelětnych zawěsćenych na wuchodźe dale jasnje niše hač na zapadźe. Zwjazkarstwo Sahry Wagenknecht žada sej mjez druhim wobmjezowanje dawkow na rentu.
Berlin/Drježdźany (dpa/SN). Za šefowku BSW Sahru Wagenknecht su jenak wulke renty na wuchodźe a zapadźe hišće přewšo zdalene. „1 385 eurow renty w Sakskej po 40 lětach dźěła nima z wukonosprawnym systemom renty ničo činić. Zo rentnarjo w Sakskej přeco hišće 169 eurow mjenje pjenjez dóstawaja hač w zapadźe, pokazuje, zo smy wot jednoty renty daloko zdaleni“, rjekny wona powěsćerni dpa. Mnozy ludźo w Sakskej maja hišće jasnje mjenje w móšni.
„Zakonska renta lědma hišće žiwjenski standard zawěsća, ale woznamjenja za dźeń a wjace wobydlerjow socialny zestup w starobje. A potom přińdźe dawk na rentu hišće k tomu. Štóž změje rentu z mjenje hač 2 000 eurow měsačnje, toho měł fiskus na pokoj wostajić“, žada sej politikarka. Jeje zwjazkarstwo žada sej wyše renty po přikładźe Awstriskeje a wobmjezowanje dawka na rentu.
Cyłoněmska jězdźenka dróša?
Düsseldorf/Berlin (dpa/SN). Wobchadni ministrojo zwjazkowych krajow wuradźuja dźensa na wosebitej konferency w Düsseldorfje wo přichodźe cyłoněmskeje jězdźenki za 49 eurow. Zwjazk njeje hač dotal přizwolene pjenjezy krajam přewostajił, čehoždla so wobchadni ministrojo boja, zo so tiket podróši . Prawdźepodobnje je zwyšenje hišće lětsa wot 1. oktobra trěbne.
Z cyłoněmskej jězdźenku, kotraž wob měsac 49 eurow płaći, móža sobujěducy bliskowobchadne srědki po cyłym Zwjazku wužiwać. Zwjazk a kraje pak dyrbja tiket financielnje podpěrać, štož płaći wob lěto 1,5 miliardow eurow. Wobchadne předewzaća niskich płaćiznow jězdźenkow dla wotpowědnje mjenje pjenjez zasłuža a tuž je tajka podpěra nuznje trěbna.
Poprawom su kraje a Zwjazk płaćiznu lětsa garantowali. „Hižo poł lěta čakamy na to, zo zwjazkowy kancler Olaf Scholz (SPD), swoje přilubjenja dodźerži“, zdźěli bayerski wobchadny minister, Christian Bernreiter (CSU).
Lěwica w Francoskej dobyła
Njewočakowany wuslědk wólbow parlamenta – premier Attal wotstupił
Paris (dpa/SN). Dźeń po njewočakowanym wólbnym wuslědku při wólbach parlamenta dyrbi so Francoska znowa orientować. Politiske nachilenje do prawicarskeho směra je słabše hač myslene. W nowej narodnej zhromadźiznje budźe prawdźepodobnje lěwicarski zwjazk najsylniša móc. Ministerski prezident Gabriel Attal je prěnje konsekwency sćahnył a swój wotstup připowědźił. Nowe jednanja kmane knježerstwo njeje při wšěm wotwidźeć. K tomu so přidruži, zo nimaja lěwicarjo zhromadne nawodnistwo a žadyn program. Runje tak njewěste je, kajke wuskutki změje wólbny wuslědk za přichod Europy a za poměr mjez Francoskej a Němskej.
Zwjazk lěwicarjow Nouveau Front Populaire, wobstejacy z komunistow, socialistow a Zelenych, je sej njewočakowano najwjetši dźěl wšěch 577 mandatow narodneje zhromadźizny zdobył.
