Zo je so před 25 lětami, dnja 3. měrca 1991, Smolerjec kniharnja załožiła, njebě samozrozumliwe. Něšto pak dyrbješe so činić. 1990, w času po změnje, zlětachu knihi z hromadami na staru hromadu. Kupcy žadachu za knihami, kotrež nje­běchu do toho na předań. Serbske knihi njemóžachu kniharnje trjebać, dokelž přetrjebachu wone regalowe metry, ale přemało ludźi je kupowaše. Knihikupstwo trjebaše bestsellery. W tej situaciji rozsudźi so nakładnistwo z tehdyšim jednaćelom dr. Pawołom Völklom nawjazujo na staru tradiciju, załožić swójsku kniharnju. Na dnju 175. narodnin Jana Arnošta Smolerja wotewrichu ju na tym městnje, hdźež bě so Arnošta Simonowa kniharnja před nimale 30 lětami zawrěła, na Kurta Pchalekowej hasy.