Smochćicy (SN). Na swojej fachowej konferency stej Serbske šulske towarstwo a Domowina minjeny štwórtk w Smochćicach prěni raz serbskorěčnu klanku „Lingufino“ předstajiłoj. Pleńčatko je wuknjenska hrajka, kotraž spóznawa rěč a na nju reaguje, tak zo móža so dźěći z njej serbsce rozmołwjeć a spěwać a so tak w rěči wukmanjeć. Nimo stawiznow, dyrdomdejow, bajkow a spěwow wobsahuje repertoire klanki tež hódančka a paćerje. „Lingufino“ předleži w dwěmaj wersijomaj, raz za maćernorěčne a raz za hornjoserbsce wuknjace dźěći.

Wuwiwarjo Drježdźanskeje firmy Linguwerk předstajichu publikumej pozadki technologije a darichu Załožbje za serbski lud 50 klankow. Załožba přepoda wjacore z nich přitomnym kubłanišćam. W běhu lěta chce załožba zwěsćić, kak so hrajka wot dźěći přiwza. Je-li wuslědk pozitiwny, chcedźa zhromadnje z Linguwerk dalše wobsahi wuwić. Tež tajka delnjoserbska klanka hodźała so přidružić.