Město Budyšin měło bywšemu měšćanej wjace kedźbnosće přicpěwać

Budyšin (SN/at). „Jurij Brězan zasłuži sej tajke česćowanje, wón pak by sej wjace kedźbnosće zasłužił“, je sej łužiska zapósłanča zwjazkoweho sejma Caren Lay (Lěwica) wěsta. Štož mjenowachu organizatorojo Budyskeje Lěwicy swjedźenske zarjadowanje k Brězanowym stoćinam, wopokaza so wčera wječor w Kamjentnym domje jako homage na sławneho Budyšana. Zhonja tule turisća wo nim? Je město na njeho hižo zabyło? Podijowa rozmołwa wo spisowaćelu a čitanje z jeho twórbow wujasništej, zo ma wón nam ze swojimi knihami dale něšto rjec.