Holcy 5. do 9. lětnika Serbskeho gymnazija Budyšin wubědźowachu so při rjanym słónčnym, ale tež wětřikojtym wjedrje spočatk meje w Budyšinje na Młynkec łuce na regionalnym finalu w lochkoatletice. Tam startowachu w sprinće na 50 m (starobna klasa IV) a 75 m (starobna klasa III), we wysokoskoku, dalokoskoku, mjetanju bulika, kulostorku (starobna klasa III), staflowym běhu a w běhu na distancy 800m.

Hnydom prěnja disciplina bě za starobnu klasu IV 50metrowski běh. Při tym sej Jitka Schadec při nadkolenu zrani. Toho­dla dyrbješe Larissa Klattec we wysokoskoku startować a Timea Stahnec w dalokoskoku. We woběmaj lochkoatletiskimaj disciplinomaj bě poprawom Jitka přizjewjena. Jara dobry wuslědk docpě Helena Dubawic z 1,33 m we wysokoskoku w swojej starobnej klasy. Při wysokosći 1,36 m pak so tež Worklečanka při noze zrani. Móžeše so pak po krótkim lěkowanju na dalokoskoku wobdźělić a naposledk jako kónčna běharka staflowy běh zakónčić. Kajki wuslědk by to był, jeli njebyštej so Helena a Jitka zraniłoj?