91 běharjow a běharkow so na 50kilometrowskim běhu wobdźěliło
Hórki/Radwor (SN/JBo). Při najrjeńšim słónčnym wjedrje poda so zašłu sobotu rano we wosmich cyłkownje 91 ludźi k startowemu dypkej Slaviamarša při sportnišću w Hórkach. Wottud wjedźeše 50kilometrowska čara podłu serbskich polow, łukow, lěsow a wsow do Radworja. Organizowali běchu wosebity marš sotře Marie-Luise a Leonie Matješkec zhromadnje z Matejom Wjeńku a Fabianom Šerakom w kooperaciji ze Serbskim młodźinskim towarstwom Pawk. W předpolu běchu młodźi Serbja hižo wšelke taflički přihotowali, kotrež wobdźělnikam a wobdźělnicam puć pokazowachu. Přidatnje stajichu čaru Slaviamarša na „Komoot“, nawigaciskej aplikaciji za aktiwity pod hołym njebjom, k dispoziciji. W Pěskecach, Koslowje a Holešowskej Dubrawce běše organizatoriski team nimo toho stacije natwarił, hdźež móžachu so běharjo a běharki wočerstwić a wšelke napoje a jědźe wužiwać. Po wužadacym maršu bě potom 86 wobdźělnikow a wobdźělnicow cil w Radworju docpěło.
