Sokoł Ralbicy/Hórki – Wojerowski FC 1:3 (0:1)
zestawa domjacych: Schöne – Šewc, Wałda, T. Bejma (75. Nuk) , Matka (68. Šiman) – B. Bejma, D. Gloxyn, Rachela, Janca (72. Kř. Matka), Šołta – Korjeńk (17. Domaška)
Cyły tydźeń so Sokoljo na njedźelnu hru přihotowachu, zo bychu faworita z Wojerec we wokrjesnym pokalnym połfinalu přewinyli. 150 přihladowarjow dojědźe sej najebać horce temperatury do Stadiona přećelstwa a dohromady 25 juniorowych hrajerjow Sokoła wobě mustwje spočatk hry na trawnik přewodźeše. Wosebity ramik za pokalny bój bě tuž hižo do hry wjace hač daty.
Tola w slědowacych 90 mjeńšinach hósć z Wojerec pokaza, čehodla je sej lětsa tež mišterstwo we wokrjesnej wyšej lize wudobył. Wot wšeho spočatka kontrolowaše wón hru, so mudrje na trawniku hibaše a stajnje běchu při sokołskich hrajerjach dwaj přećiwnikaj. Ralbičenjo so tuž skerje na kontery koncentrowachu, tola přestrašne te njeběchu.
