Sokoł Ralbicy/Hórki II – ST Porchow II 6:0 (1:0)

Zestawa domjacych: Bjeńš – C. Bejmak, Ch. Gloxyn, Kocor, Kobalc – Wałda, Rawš, Hrjehor, Materna – Zimmermann (46. Jakubaš), Kurjat

Njedźelu připołdnju dyrbještej rezerwje z Ralbic a Porchowa hišće raz při tropiskich temperaturach přećiwo sebi hrać. Na zbožo duješe chětro sylny wětr, tak zo bě na delanskim trawniku tola cyle přijomnje za bulom honić.

Sokoljo přewzachu wot wšeho spočatka komando a tłóčachu na prěnje wrota. Tute poradźichu so jim po 15 mjeńšinach přez Tomaša Rawša, kiž steješe po rjanej stafeće w šěsnatce cyle prawje a bul k nawjedowanju přez wrotowu li­niju suny.

Na to pak hrajachu tež hosćo jara derje sobu a wuhrachu sej w slědowacych mjeńšinach hnydom tři dobre składnosće. Jurij Bjeńš pak dwě z nich znješkó­dni, třeći pospyt dźěše nimo wrotow. Ralbičenjo mějachu tež tu abo tamnu dobru móžnosć, na 2:0 zwyšić, tola před wrotami zaprajichu jim čuwy.