Druhi dźeń hód je za mnohich sportowsce zajimowanych kruće zaplanowany, znajmjeńša dopołdnjo. Tola minjenej dwě lěće dawaše na tutym datumje „jenož“ sport za črjewa. To měješe so w lěće 2022 zaso změnić. A tak so tež sta. 250 ludowych sportowčow a sportowcow ­dósta dopomnjenku za sportowe koło wokoło Němskopazličanskeho wulkeho hata. Wobdźělnicy pohibowachu so we wšelakich formach joggujo, spěšnje chodźo, w stilu nordic walkinga, kolesujo, pućujo abo woni ćišćachu dźěćace wozyčki. Nowostka lětsa bě, zo měješe koło wjacore drjewjane husycy na štomach. Na nich stejachu widźomnje za kóždeho wobdźělnika podaća distancy w metrach, kotruž bě hižo absolwował.