Na tradicionalny piwowy cup běchu sej minjeny tydźeń stari knjezojo sportoweho towarstwa Módro-běli Kulow znowa sydom mustwow z blišeje a dalšeje wokoliny přeprosyli. Po dwěmaj lětomaj přestawki wjeselachu so wšitcy na měrjenje mocow. Nimo znatych cyłkow z Großröhrsdorfa, Kumwałda, Wojerec, Weixdorfa a Němskich Pazlic běše lětsa nowačk z Budyšina pódla. Hraješe so w dwěmaj staflomaj, a to stajnje dwanaće mjeńšinow. Prěnje dwě mustwje kwalifikowaštej so za połfinale. W semifinalu kopaše so potom přez křiž, tak zo nastaštej wulke a małe finale.

W stafli 1 hraješe domjacy cyłk z Kulowa, kotryž běše zdobom zakitowar pokala. Suwerenje wšitke partije dobychu, bjez jeničkeho napřećiwneho wrota. Druhe městno zaruči sebi nowačk ST Budyšin. Koparjo z města přewinychu direktneho konkurenta z Großröhrsdorfa w poslednjej skupinskej hrě z 3:1.