Sokoł Ralbicy/Hórki –

HZ Łaz/Běły Chołmc 9:0 (2:0)

zestawa domjacych: Ch. Gloxyn – Rawš, Schultz, A. Wałda, Matka (66. Kunze), D. Gloxyn, Šewc, Šołta, T. Wałda (66. Ričl), Bejmak (54. Nuk), Domaška (75. Lulak)

W hrach wokrjesneho pokalneho koła jewi so husto raz kanterowe dobyće. Najčasćišo w prěnim abo druhim kole, hdyž hraje wulki faworit přećiwo małemu mustwu z wokrjesneje klasy. Před lětami nawróćichu so Sokoljo na přikład hižo raz z Wjazońcy z dobyćom 14:0.

Zo pak su so Sokoljo po wčerawšej hrě z tajkim kanterowym dobyćom wot swojich přihladowarjow zaso rozžohnowali, z tym nichtó ličić njemóžeše. Přećiwnik z Łaza/Běłeho Chołmca wšak steji w tabulce wokrjesneje wyšeje ligi pódla Sokołow a z tym wočakowachu 140 přihladowarjo poprawom napjatu hru we wosmifinalu wokrjesneho pokala. Pola Ralbičanow pobrachowachu nowopřichadaj Pius Šołta a Rafael Šołta a stajnej hrajerjej Paul Rachela a Bosćij Bejma. Ale tež přećiwnik z Łaza dyrbješe bjez stajnych hrajerjow startować.