Łužiske lodohokejowe liški –

EC Kassel Huskies 1:4

(0:2, 0:1, 1:1)

Hižo zazběh do partije pokaza, zo njemóžachu Liški wulku trěbnu napjatosć hižo wjace natwarić. Pobrachowaše na tempje a dokładnosći. Huskije porno tomu běchu wusměrjeni a chcyćiwi na to, měch spěšnje začinić. Nimale šěsć mjeńšinow běchu domjacy z tym zaběrani, hosći z jich defensiwneho pasma wuhnać. Tola krótko pozdźišo klinkaše. Tónraz mějachu Hessojo powerplay. Sylna třělwa Tomaša Sykory zadyri do dołheho róžka wrotow. Hra z hrajerjom wjac na polu traješe tam runje wosom sekundow.

A přińdźe hišće hubjeńšo. Darren Mieszkowski wotfalšowa distancowu třělwu Joela Keussena wuspěšnje k 2:0. Samo na sebi bě tam jasne, zo bě hra rozsudźena. Hač na mało móžnosćow njebě žanych wrotowych šansow wjac za Hornjołužičanow. Spočatk druheje třećiny zwyši znowa Darren Mieszkowski na 3:0. Wot tam přiwza partija skerje charakter testoweje hry. Twjerde stajenje ćěła, zakusane dwuboje, šćedriwe wrotowe sceny, wšo to bě rědke.