ST 1922 Radwor – HZ Łaz/Běły Chołmc 4:3 (2:1)

Za Radworske mustwo zasadźeni: Grenzemann – Reinecke, Šěrak, Pěčak, Paška (93. Seiler), Wjacławk (36. Schulze), Schöne (46. Měrčink), Nuk, Grubert (83. Wjeńka), Castejon, Šnajder

Zeleny štwórtk bě prěnja prawa domjaca hra za Radworskich koparjow, a wona přiwabi 75 přihladowarjow. Hižo w prěnjej partiji we Łazu bě sej mustwo trenarja Marija Bischofa tři dypki sobu domoj wzało. Wróćohra nětko bě spočatnje poměrnje wurunana. Radwor pak dósta partiju poněčim pod kontrolu. Škit hosći pak móžeše dołhe třělwy přećiwnikow derje wotwobarać. Hižo we 18. min. móžeše so Johannes Wjacławk na swojim křidle přesadźić a bul nimo wrotarja k 1:0 do klětki sunyć. Direktnje po tym trjechi Richard Šnajder w 21. min. k 2:0. Hosćićeljo bychu hišće dalše šansy wužić móhli, ale přeco zaso noha přećiwni­skeho hrajerja dalšim wrotam zadźěwa. Bohužel Radworscy koparjo wotežki ­do połčasa trochu pušćichu, tak zo dóńdźe k 2:1.