Awtor dźensa

Jurij Bjeńš

Pomału nachila so koparska sezona a nimale we wšěch ligach budźe lětsa hladajo na mišterstwo, postup a zestup najskerje hač do poslednjeho hrajneho dnja napjeće wostać. Štož so w prěnjej, druhej a tež třećej zwjazkowej lize stawa, wšak kóždy koparski fan w telewizoru abo interneće zhoni. W štwórtej, potajkim regionalnej lize, tłóču wosobinsce Energiji Choćebuzej palcy, zo steja na kóncu na słónčnym městnje tabulki. Jeli so to chowancam trenarja Claus-Dietera Wollitza poradźi, pak hišće do třećeje ligi postupić njesmědźa. W padźe mišterstwa wojuja potom hišće w dwěmaj partijomaj přećiwo mištrej regionalneje ligi Baworskeje wo postup. A to budźe z wulkej wěstosću SpVgg Unterhaching. Chětro sylny to přećiwnik, kiž bě po mojim měnjenju faworit. Hišće pak je wšitko spekulacija, kónc meje smy mudriši.