W lěću so črije za halu do róžka staja a hraje so bičwolejbul, štož je nimale njezapisany zakoń. Tež pola 1. žónskeho wolejbuloweho mustwa viktorije Worklecy to poprawom přitrjechi. Ale nic lětsa, praji Rejzka Rawšec, hrajerka Worklečanskeho cyłka: „Wjetšina holcow je přez cyłe lěćo jónu wob tydźeń w hali. Trenuja tam hižo trochu na nowych taktikach a snano hišće wažniše, njezhubja z tym začuće za hraće w hali.“ Změna wot pěska wróćo do hale je mjenujcy přeco ze znowanawučenjom na hinaše wuměnjenja zwjazana. Tutón čas chcedźa sej lětsa zalutować.

Prawa přihotowanska faza je so w awgusće zahajiła. Jedna z prěnich prioritow rěka ćělna fitnes. Prawidłowny trening w hali, ćělne zwučowanja doma a hraće bičwolejbula drje su dobre móžnosće sebi swójsku fitnes zdźeržeć, ale dokelž nima kóždy čłowjek jenaku motiwaciju so napinać, je prěni krok do noweje sezony, zo cyłe mustwo wěsty fitnesowy staw docpěje.