Bičwolejbulisća w starobnymaj klasomaj 7. do 9. lětnika a 10. do 11. lětnika Serbskeho gymnazija Budyšin (SGB) wobdźělichu so wuspěšnje w Drježdźanach na sakskim finalu we wurisanju „Młodźina trenuje za olympiju“.

Bičwolejbulisća wubědźowanskeje klasy SK III, potajkim 7. do 9. lětnika, mějachu so tróšku ćežko, so přećiwo druhim mustwam přesadźić. Hrajny modus bě kóždy přećiwo kóždemu a stajnje dwě dobyćerskej sadźbje hač do 15 dypkow. Prěnja hra přećiwo měšćanskemu gymnazijej Riesa je hólči duwo drje dobył, holča dwójka a miks-mustwo pak podležeštej jemu. Z tym přěhrachu cyłkownu hru z 0:2. Tež partiji přećiwo měšćanskemu gymnazijej Mittweida a Ehrenbergowemu gymnazijej Delitzsch skónčištej so z 0:2 za kontrahentow. Poslednja hra so tež njezbožownje z 0:2 za Lessingowy gymnazij Plauen woteda. Přiwšěm pokazachu sportowče a sportowcy dobre wukony w formje dobytych jednotliwych sadźbow.