Pjaty raz wuhra so w sportowni Powołanskošulskeho centruma Budyšin abi-cup přichodnych maturantow Sprjewineho města we wolejbulu. Dwanatkarjo Serbskeho gymnazija Budyšin (SGB) dobychu turněr wosom startowacych cyłkow. Jědnatkarjo wubědźichu sej 3. městno.

Tydźenja powita šulski nawoda Budyskeho Powołanskošulskeho centruma Uwe Richter šulerjow 11. do 13. lětnika do tamnišeje sportownje na tak mjenowany abi-cup. Wosom wolejbulowych cyłkow, wobstejacych z dweju holcow a štyrjoch hólcow, wojowachu pjaty raz wo dobyće pućowanskeho pokala. Dotal běchu abiturienća SGB dwójce wuspěšni, a to w lětomaj 2018 z kapitanom Dawidom Wowčerjom a w lěće 2019 z kapitanom Jakubom Bobku. Tónraz juskachu znowa přichodni maturanća serbskeho kubłanišća wokoło Eliasa Kummera. Woni přesadźichu so w finalu přećiwo lońšemu dobyćerjej Melanchthonoweho gymnazija z 2:0.