SJ Chrósćicy –

Módro-běli Zschachwitz 1:0 (0:0)

Zestawa domjacych: Králíček – Mark (68. M. Wencel), Kreuz, Cyž, L. Zahrodnik, Graf, Hawš, Matik (65. Handrik), G. Zahrodnik, Młynk, Matješk (89. Runt)

Hrajerjo SJ Chrósćicy su přećiwnika ze Zschachwitza minjenu njedźelu doma wočakowali. Tutón steješe na štyrnatym městnje w tabulce – jedne městno před Chróšćanami. Přihladowarjo móžachu so tuž na brizantny duel wjeselić.

Hra běše wot spočatka jara wurunana. Wobě mustwje spytaštej so spěšnje do šěsnatki přećiwnika předrěć. Prěnje dobre móžnosće pak sej hosćo wuhrachu. Najlěpšu tajku mějachu w 25. min. Sylna třělwa přećiwnika ze zdalenosće 20 metrow dótkny so łaty a skoči zaso wróćo do pola. Při tamnych akcijach so zas a zas sylny wrotar Chróšćanow, Petr Králíček, wopokaza a bule suwerenje wotwobara. Tež wrotar hosći, Paul Schramm, dyrbješe so raz naćahnyć, jako jeho w 35. min. Michał Młynk z třělwu pruwowaše. Dalše dobre móžnosće pak sej mustwje wuhrać njemóžeštej.