Budyšin (SN/bn). „Wjeselu so, tak krótkodobnje tu hrać směć. Jako předwčerawšim naprašowanje dóńdźe, hač njemóhł za nažel schorjeneho Tomaša Žura zaskočić, sym hnydom a z wulkej radosću program zestajił, kotryž so za tele mjeńše bóle rjeńše pišćele hodźi.“ Z tymle słowami powita Zhorjelski organist Reinhard Seeliger wčera něhdźe 50 wopytowarjow wosmeho koncerta lětušeho rjadu Budyske pišćelowe lěćo w tamnišej tachantskej cyrkwi. Wjelelětny rektor a docent Wysokeje šule za cyrkwinsku hudźbu Zhorjelc a kantor cyrkwje swj. Pětra a Pawoła mjenowaše změnu z „wulkich ‚słónčnych byrglow‘ w Zhorjelcu na Kohlowy instrument“ w sprjewinym měsće wužadowanje, na kotrež pak so „rady zwaži“. Komponistow a twórby swojeho programa skrótka předstajiwši wón publikumej mjez druhim rozłoži, zo „je passacaglia wosebita forma wariacije, w kotrejž so pedalowa basowa tema wobstajnje wospjetuje, mjeztym zo ruce swobodnje po manualach spěchatej“ a zo bě „w dobje baroka z wašnjom, sej kompozicije kolegow takrjec wupožčić a w swójskim wobdźěłanju předstajić“.