Budyšin (kb/SN). Bywša škleńčernja na Budyskej Sukelnskej bu w minjenych lětach krok po kroku na wotewrjenu dźěłarnju wutwarjena. Tak mjenowanemu coworking space/makers place rěkaja Dźěłań dźeń; w prědnim rumje, z pisanskimaj blidomaj a kuchnju wuhotowany, steji samo-twarjeny kicker před małym jewišćom, w dalšich rumach skića dźěłarnje składnosć na přikład ćěslić, z laserom grawěrować abo so na polu robotiki wuspytować. Wšitke rumy wuprudźeja přihódny flair. Po dźěłarnjach pomjenowane, cyłu ležownosć wobhospodarjace a wuhotowace towarstwo, wopisuje je jako „swobodny rum za kreatiwne hłójčki“ – nic jenož za dźěło, ale tež za tójšto kulturnych zarjadowanjow. Tak organizuja tam prawidłownje mjez druhim wustajeńcy, koncerty a přednoški. Minjenu sobotu su lětuši rjad lětnich zarjadowanjow z koncertom Choćebuskeho duwa STOI & Janko, zahajili. Jeju wustup bě interaktiwny. STOI zamó ze zwjeselacym, delnjoserbsce, němsce a nižozemsce interpretowanym freestyle rapom publikum k tomu pohnuć, sobu spěwać.