Premjera młodźinskeho dźiwadła w dobrej tradiciji kolebki talentow

Budyšin (SN/bn). Serbske młodźinske dźiwadło při Němsko-Serbskim ludowym dźiwadle je wčera swoju nowu inscenaciju­ „Pjeršćeń“ premjernje předstajiło. Na wupředatej wulkej žurli Budyskeho Dźiwadła na hrodźe zahori dohromady dźewjeć dorostowych hrajerkow a hrajerjow publikum z adapciju srjedźowěkowskeho rjekoweho eposa „Nibelungenlied“, kotryž wobhladuje so do dźensnišeho jako narodny mytos Němcow. Na tymle zakładźe bě Theo Fransz hru spisał, kotraž jednanje radikalnje zhusća a tragisku stawiznu kołowokoło Siegfrieda, zmija Fafnira a lutka Albericha w dobrej hodźince wotbłyšćuje. Nawoda młodźinskeho dźiwadła a režiser inscenacije Měrko Brankačk bě ju dowoliwši akteram awtentisku wobchadnu rěč młodźiny zeserbšćił a ze swojimi chowancami nazwučował. Jako rěčnik a z pomocu pneumatiskeje truby wón wotběh aktiwnje wobwliwuje.