Premjera swobodneho jewišća

Budyšin. Swobodne jewišćo Bühnenvolk předstaji dźensa, pjatk, prěni raz swoju nowu inscenaciju „Intervention – Wer sich erinnert, war nicht dabei!“ Na njedobrowólnje komiske, ale bolostne wašnje rozjimuje hra Rebekki Kicheldorf w režiji Michi Linkeho aspekty chcyćiwosće. Premjera wotměje so na małej žurli Budyskeho Dźiwadła na hrodźe a započnje so w 19.30 hodź. Zajutřišim slěduje w 17 hodź. na samsnym městnje přichodne předstajenje. Zastup płaći stajnje 18 eurow.

Film wo prěnim filozofje

Zhorjelc. „Jacob Böhme – Leben und Werk“ rěka němsko-pólski dokumentarny film wo žiwjenju, skutku a myslach prěnjeho němskeho filozofa. Jutře, sobotu, pokazaja pask we wobłuku wosebiteje wustajeńcy „Lilienzeit – Der mystische Philosoph Jacob Böhme und die Erneuerung der Welt“ w Šleskim muzeju Zhorjelc. Po předstajenju wotmołwja režiser Łukasz Chwałko, kiž bě film na městnach wjerćał, kotrež su w žiwjenju Böhmeho rólu hrali abo dźensa na njeho dopominaja, na prašenja wopytowarjow. Zarjadowanje započnje so w 17 hodź., zastup płaći 5 eurow.