Budyšin (SN/mb). Na hłownu zhromadźiznu Maćicy Serbskeje je sobotu 40 ludźi, sobustawojo a hosćo, na žurlu Serbskeho muzeja w Budyšinje přichwatało. Na dnjowym porjedźe zeńdźenja wědomostneho towarstwa stejachu mjez druhim změny wustawkow a směrnicow fondsa Salowskeho. Próstwomaj wo spěchowanje z fondsa su hižo do toho přizwolili. W lětušim wědomostnym přednošku wěnowaše so dr. Kito Kśižank městnostnym mjenam a Delnjej Łužicy.

Prof. Dietrich Šołta powita přitomnych, tomu so spominanje na zemrětych čłonow přizamkny. Ćežišćo hłowneje zhromadźizny tworješe rozprawa předsydstwa, kotruž je předsydka dr. Anja Pohončowa přednjesła. Wona so wšěm sponsoram towarstwa a darićelam darneho abonementa Rozhlada dźakowaše. Ličba čłonow je z aktualnje 105 stabilna. Wjele prócy su za přihot prawniskich změnow wustawkow nałožowali, zo bychu towarstwu status powšitkownowužitnosće wobchowali. W dźěłowej skupinje staj nimo předsydki tež Cordula Ratajczakowa a Robert Lorenc skutkowałoj.