Swěrni fanojo Łužiskich lodohokejowych liškow su nowy rekord trajnych kartow nastajili. Cyłkownje 1.096 městnow trajnych kartkow je aktualnje za DEL2-sezonu 2024/2025 hižo předatych. To je hižo nětko 90 tiketow wjac hač minjenu sezonu a předawanska perioda njeje hišće ke kóncej. Hač do 30. junija 2024 hodźa so hišće kartki kupić.

Jedna z přičinow za nětko hižo přetrjechenu ličbu předatych trajnych kartkow je tež nowy kader Liškow a jich nowy nazwučowar. Wot zakónčenja zašłeje sezony dźěłaja w Běłej Wodźe akribisce na nowym kadru, po tójšto nowych transferach su nětko dalše personalije wěste.