Myto Zejlerja spisowaćelce Jěwje-Mari Čornakec swjatočnje spožčili
Kamjenc (SN/bn). Wuzběhnywši stawizny cyrkwje swj. Hany jako Boži dom ewangelskich Serbow w Kamjencu zahaji wčera Martin Kühne w mjenje ewangelsko-lutherskeje wosady Kamjenc-Hlinka swjatočne spožčenje Myta Zejlerja 2024. Wyši měšćanosta Lessingoweho města Roland Dantz (njestronjan) wjeseleše so, „zo so tele wuznamjenjenje mjeztym šesty raz tu a nic na přikład w Drježdźanach abo Budyšinje přepoda. Serbskosć je w Kamjencu samozrozumliwa a dźěl zhromadnych stawiznow, na kotrych zakładźe njech natwarmy zhromadnu Europu“. Sakska statna ministerka za kulturu a turizm Barbera Klepsch (CDU), kotrejež ministerstwo myto dwulětnje „za wusahowace abo přikładne wukony na polu přiswojenja, nałožowanja kaž tež posrědkowanja serbšćiny“ spožča, gratulowaše lětušej lawreatce Jěwje-Marie Čornakec, zaměr wuznamjenjenja zjimajo: „Serbska rěč a kultura stej njesměrne wobohaćenje za Saksku. Mamy nadawk, zajim za njej budźić, jej šěrić a dale wuwiwać.
