Wuspěšna premjera z nowym konceptom w Čornym Chołmcu
Čorny Chołmc (JK/SN). Nic jenož organizatorojo a akterojo noweje inscenacije wo Krabaće w Čornym Chołmcu, ale tež mnozy wopytowarjo hladachu wčera popołdnju starosćiwje k njebju a přejachu sej, zo so dešć pominje. Dypkownje k zahajenju premjery prěnjeje hry noweho cykla wo Krabaće pod hesłom „Na spočatku bě swětło“ so dešć pominy a pokaza so najlěpše wjedro za hru pod hołym njebjom.
To, štož akterojo a mnozy pomocnicy za kulisami pod nawodom młodeho Antona Fuchsa w režiji Michaela Kuhna pokazachu, bě wulkotna hra. Tuta přez cyłe tři hodźiny wjace hač 900 přihladowarjow zahori. Čornochołmčanske towarstwo Krabatoweho młyna pod wjednistwom Tobiasa Čižika bě hromadźe z wobydlerjemi, towarstwami a lajskimi kaž tež powołanskimi dźiwadźelnikami nowy cyklus wo sławnym Krabaće zahajiło. Kaž bě připowědźene, powědaja nětko stawiznu Krabata, jeho pochada a wuwića znowa, pod nowymi aspektami a z nowymi elementami.
