Berlin (dpa/SN). Předsyda FDP Christian Lindner po zwrěšćenju swojeje strony we wólbach zwjazkoweho sejma na pjeć procentowskej zawěrje politisku runinu wopušći. Tole je wón na internetnej platformje X připowědźił. Oficialne wobkrućenje FDP hišće njepředleži. „Smy so loni nazymu z połnym politiskim rizikom za naš kraj do boja podali. Nětko tole droho zapłaćimy“, Lindner wčera wječor po wozjewjenju wólbnych wuslědkow rjekny. Wón bě 2013 nawodnistwo strony přewzał, kotraž bě runje ze zwjazkoweho sejma zlećała a wodźeše liberalnych 2017 z 10,7 procentami wróćo do parlamenta. Strona je so wot toho časa dale a bóle na jeho wosobu wusměriła.

Změny připowědźa so tež pola SPD. Nawodnistwo strony namjetuje, nawodnistwo frakcije w zwjazkowym sejmje do rukow Larsa Klingbeila połožić. Tole je tuchwilny předsyda Rolf Mützenich zdźělił. Mützenich nawjeduje frakciju wot lěta 2019. Wuslědk wólbow pak žada sej „generacisku změnu na čole socialdemokratiskeje strony“, Mützenich piše.

Wčerawše wólby zwjazkoweho sejma běchu drje najwažniše wólby minjenych 20 lět w Němskej. Wolerjo su ze swojim hłosom jasnje zwuraznili, zo chcedźa hinašu politiku. Z kim so Friedrich Merz do noweho zwjazkoweho knježerstwa poda, njeje w tym zwisku ani tak wažne: Ludźo wočakuja jasne ćežišća noweho kanclera, w hospodarskej, energijowej, klimowej a měrowej politice.

Runje posledni dypk je ludźom jara wažny, kaž sylny wuslědk Lěwicy pokazuje. Merz móže dopokazać, zo je kmany, wójnsku politiku dotalneho knježerstwa změnić. Dołhodobnje w Europje bjez Ruskeje njepóńdźe. Dotal wšak ničo wotpowědneho wot Merza słyšał njejsym. Ludźo wočakuja w prěnim rjedźe nawrót k rozumnosći a kónc ideologisce barbjenych sonow. Zo měnja wolerjo to jara chutnje, pokazuje wuslědk AfD na wuchodźe. Hdyž Merz tole njespóznawa, móže sej AfD za štyri lěta pjenjezy za wólbne plakaty lutować. Marko Wjeńka

Lutowarničce dweju dźěsći pokradnył je paduch w jednoswójbnym domje w Dummersdorfje njedaloko Rostocka. Njeznaty skućićel bě so minjenu srjedu zadobył, jako njebě nichtó doma. Zaměrnje paduch w prěnim poschodźe domu wšitke kamory přeborka. Tam pokradny naručny časnik 50lětneho nana a – wobě lutowanskej swinjeći dźěsći. Policija nadźija so špatneho swědomja paducha.

Na mokrej łuce ze swojim transporterom tčacy wostałoj staj paduchaj w schwabskim Memmingenje. Swědcy běchu policiji zdźělili, zo su paduši wjacore nastroje z twarskeho kontejnera pokradnyli. Zastojnicy wuhladachu na to muža a žonu w awće na błóćanej łuce njedaloko kontejnera. Kradnjene nastroje w hódnoće 10 000 eurow stejachu na kromje łuki. Padustwo móžachu zastojnicy woběmaj přirjadować, w rozprawje rěka.

Mnoho čitarjam SN je Trudla Malinkowa derje znata přez informatiwne nastawki, zajimawe knihi a putace přednoški, kotrež ćěmne blaki stawiznow wuswětluja. Pilnje a akribisce serbske kulturne a cyrkwinske stawizny přeslědźuje. Jeje dopóznaća potom rady a zahoriće šěro­kemu publikumje posrědkuje. Tak naš wid na wuwiće Serbstwa wudospołnja a tež wobnowja. Dnja 21. februara wo­swjeći Trudla Malinkowa swoje 70. narodniny.